Itxas-gain K.E.

Asteburu ezin hobea izan da klubarentzat. Larunbatean Urola ibaiaren igoera-jaitsiera izan genuen, eta atzo berriz Bidasoako jaitsiera. Bietan oso ondo ibili dira gure piraguistak eta klub onena izan gara. Gauzak horrela, Plentzian ere onenak izan ginela kontuan hartuta, aurtengo Euskadiko Ibaien Kopa Itxas-Gainek irabazi du nagusitasun osoz.

Larunbata egun berezia izan zen guretzat, Urolako igoera-jaitsiera jokatu baitzen. Antolaketa lanek ematen dituzten buru hausteak alde batera utzita, Itxas-Gain oso pozik dago lortutako emaitzarekin. Egia da normalean baino parte hartze eskasagoa izango duela aurtengoak, baina nabarmena izan zen etxeko piraguisten nagusitasuna. Senior mailan, K2an onenak izan ziren Xabier Osa eta Josu Ansola gizonezkoetan, eta Maialen Velarde eta Maria Olazabal emakumezkoetan –Maite Amilibia eta Ane Eizagirre bigarren izan ziren–. Oier Aizpuruak ere ez zuen aurkaririk izan K1ean. Jubeniletan, Idurre Peña eta Loredi Alzibar onenak izan ziren K2an; eta kadetetan, Ander Lizeagak K1ean irabazi zuen, eta Miren Lopetegik eta Amaia Olaizolak K2an. Eta horiez gain, podiumeko beste postu batzuk ere lortu ziren.

Josu Ansolak eta Xabier Osak hasieratik hartu zuten estropadaren burua. “Aitor Irulegi eta Borja Estomba ziren gure aurkari gogorrenak, eta hondartzako irteeran arazoren bat izan dute eta atzean gelditu dira. Hor erabaki dugu ziztu bizian irten eta ahalik eta tarterik handiena egitea. Aldea eginda, ez dugu irabazteko arazorik izan”, azaldu digu Josu Ansolak. Oier Aizpurua haiekin batera helnugaratu zen, bigarrenari alde handia kenduz.

Bidasoan ere bikain

Bidasoako jaitsieran ere lan bikaina egin dute etxeko piraguistek. Klubeka lehen postua lortu dute han ere –Santiagotarrak klubak egindako sailkapenean bigarren ageri da Itxas-Gain, beteranoak ere kontuan hartzen dituztelako; dena den, Federazioaren sailkapenean beteranoak ez dira kontuan hartzen eta hor Itxas-Gain da onena–. Senior mailan, berriro irabazle izan ziren Xabier Osa eta Josu Ansola, Oier Aizpurua, eta Maialen Velarde eta Maria Olazabal –Amilibia eta Eizagirre berriro bigarren–. Gainera, Karmele Eizagirrek eta Maitane Ruizek K2koa osatu zuten kadeteetan eta hauek ere irabazi egin zuten. Podiumeko postuak lortu zituzten Loredi Alzibarrek (2.), Mikel Solozabalek eta Kepa Larrañagak (2. Urolan bezala), eta Miren Lopetegik eta Amaia Olaizolak (3.).

Wey Kayak klubeko piraguistak

Aipamen berezia merezi dute Ingalaterratik etorri ziren Wey Kayak klubeko piraguistek. Hemendik probetara ohitu gabe, nahikoa komeria izan dituzte estropadak amaitzeko, baina, aldi berean, sekulako kemena erakutsi dute. Larunbatean batzuk Santiagoko hondarretan kateaturik gelditu ziren, eta atzo Bidasoako jaitsierako ur-jauzian batek baino gehiagok piragua hautsi ere hautsi zuen, baina nola edo hala probak amaitzeko gauza izan dira. Gauean denak afaltzeko bildu ginen Itxas-Gain elkartean eta hurrengo urtean bueltatzeko gogoz daudela esan ziguten.

Sailkapenak:

Urola 2008

Bidasoa 2008

Argazki-erreportajea (baleike.com)

Irteerako bideoa (baleike.com)

(2007ko argazkiak) 

Larunbatean, uztailak 19 (17:30), jokatuko da Urola ibaian Igoera-Jaitsiera. Aurtengoa XXII. aldia izango da. Urtero piraguista asko erakarri ditu, batez ere irteera oso ikusgarria delako –Santiagoko hondartzatik egiten da–, baina aurten parte hartzaile kopurua eskasagoa izango da, Espainiako Federazioak proben egutegian azken orduan egin dituen aldaketen ondorioz. Izan ere, Zaragozan jokatu behar ziren bi proba bertan behera gelditu ziren Ebro ibaiak gainezka egin eta uholdeak izan zirelako. Bi proba horiek Espainiako Kopakoak dira eta bat larunbat honetan jarri dute. Ondorioz, klub asko ezingo dira Zumaiara etorri, ez dutelako egun berean bi probetara joateko modurik. Esan behar da Espainiako Federazioak abisatu gabe hartu duela erabakia, inorekin kontsultatu gabe eta kontuan hartu gabe jadanik egutegian zeuden beste probak.

Irungo Santiagotarrak klubeko kideek ere deitu digute proba bertan behera uztekoak ote garen. Kontua da beraiek igandean antolatzen dutela Bidasoaren jaitsiera, eta Zumaiara etortzen diren klubak dira gero igandean Irunera joaten direnak. Azkenean Itxas-Gainek erabaki du proba antolatzea, atzeratzeko ere ez dagoelako data egokirik. Beraz, etortzen direnekin jokatuko da aurtengo proba.

Wey Kayak klubeko kideak Ingalaterratik

Albiste onak ere badaude, hala ere. Gogoan izango duzue Sanpedroetan Ingalaterran izan zirela Itxas-Gaineko piraguistak, hango Wey Kayak klubak gonbidatuta. Bada orain haiek etorriko dira, larunbatean parte hartzera. Ostiralean iritsiko dira eta espero dugu egonaldi ona izatea.

Ibilbidean ez dago aldaketarik: Santiagoko hondartzatik egingo da irteera; gero, errioan gora Korta industriaguneraino –zubia pasa eta berehala egongo da buia–; eta helmuga Arbustaingo Arranplaren parean. Guztira 12 kilometro inguru.

Zumaiarren artetik, dagoeneko erabakita dago zeintzuk hartuko duten parte:

K1 senior (giz): Oier Aizpurua, Vicente Royo

K2 senior (giz): Josu Ansola eta Xabier Osa / Ekaitz Esteban eta Raul Moreno /Ander Aizpurua eta Julen Aizpurua

K1 junior (giz): Kepa Etxabe

K2 kadete (giz): Mikel Solozabal eya Kepa Larrañaga

K1 kadete (giz): Xabier Centeno, Ander Lizeaga eta David Julia

C1 kadete (giz): Jon Velarde

K2 senior (emak): Maialen Velarde eta Maria Olazabal / Ane Eizagirre eta Maite Amilibia

K1 junior (emak): Arri Yeregi

K2 junior (emak): Idurre Peña eta Loredi Alzibar

K1 kadete (emak): Karmele Eizagirre, Maitane Ruiz

K2 kadete (emak): Miren Lopetegi eta Amaia Olaizola

Joan den larunbatean Plentziako proban hartu zuten parte Itxas-Gaineko piraguistek, Errioetako Euskadiko Txapelketaren barruan. Maila bikaina eman zuten gure ordezkariek, parte hartu zuten 20 kluben artean onena izan zelarik. Podiumeko postu asko lortu zituzten, tartean bost garaipen. Beste behin erakutsi dute maila goreneko piraguistak ditugula Zumaian.

Hemen dituzue Plentziako sailkapenak:

Gizonak
Senior K2
1. Irulegi / Estonba (Donostia Kayak K.E.)
2. Cerra / Cangas (C.P. El Sella)
3. Ansola / Osa (Itxas - Gain K.E.)

Junior K2
1. Medrano / Valiente (Centro Natación Helios)
2. Ardanaz / Arrieta (C.P. Plentzia)
3. Fernandez / Rubio (Donostia Kayak K.E.)

Kadete K2
1. Rubio / Prado (Kayak Castro Urdiales)
2. Solozabal / Larrañaga (Itxas - Gain K.E.)
3. Astorki / García (Barrika P.T.)

Beteranoak K2
1. Garcia / Castaño (Real Grupo Cultural Covadonga)
2. Cacho / Hernandez (Cisne Asociación Polideportiva)

Senior K1
1. Oier Aizpurua (Itxas - Gain K.E.)
2. Fernando Franco (Deva Unquera)
3. Luis Medrano Miguel (Cisne Asociación Polideportiva)

Junior K1
1. Aritz Araneta (Donostia Kayak K.E.)
2. Kepa Etxabe (Itxas - Gain K.E.)
3. Jacob Roncales (Centro Natación Helios)

Kadete K1
1. Marco Fernandez (Deva Unquera)
2. Ander Lizeaga (Itxas - Gain K.E.)
3. Juan Carlos Figuero (Cantabria Multisport)

Beteranoak K1
1. Raul Gonzalez (Cisne Asociación Polideportiva)
2. José Luis Cueto (Piragüismo Astur)
3. José María Quintana (Kayak Castro Urdiales)

Kadeteak C1
1. Daniel Nalda (Donostia Kayak K.E.)
2. Daniel Millan (Centro Natación Helios)
3. Iñigo Alfonso (Donostia Kayak K.E.)

Emakumeak
Senior K2
1. Velarde / Olazabal (Itxas - Gain K.E.)
2. Amilibia / Izagirre (Itxas - Gain K.E.)
3. Iragi / Escandon (C.P. Plentzia)

Junior K2
1. Peña / Alzibar (Itxas - Gain K.E.)

Kadete K2
1. Eizagirre / Olaizola (Itxas - Gain K.E.)
2. Galan / Valenzuela (Centro Natación Helios)

Senior K1
1. Ana Gonzalez (Kayak Castro Urdiales)
2. Ane Iragi (Barrika Piragua Taldea)

Junior K1
1. Virginia Canal (Kayak Castro Urdiales)
2. Ohiana Fernandez (Donostia Kayak K.E.)
3. Ainhize Olaiz (C.P.Plentzia)

Kadete K1
1. Miren Lopetegi (Itxas - Gain K.E.)
2. Miriam Garcia (Donostia Kayak K.E.)
3. Esther Perez (Kayak Castro Urdiales)

Euskal klubak:
1. Itxas - Gain K.E.
2. Donostia Kayak K.E.
4. C.P. Plentzia
8. Barrika P.T.
13. C.P. Getxo
(20 klubek hartu zuten parte)

Hemen gara, Ingalaterratik bueltan, gorputza nekatuta baina oso pozik Guildforden pasa dugun asteburu luzearekin. Kirol arloan oso esperientzia aberasgarria izan da, eta emaitza onak lortu ditugu gainera. Eta bestetik, jende atsegina ezagutzeko aukera izan dugu, turismoa ere egin dugu Londresen… Hemen duzue bidaia berezi honen kronika:

Ostegun arratsaldean abiatu ginen Zumaiatik: Josu Ansola, Kepa Etxabe, Maite Amilibia, Ane Eizagirre, Kepa Larrañaga, Mikel Solozabal, Miren Lopetegi, Amaia Olaizola, Idurre Peña, Karmele Eizagirre, Andoni Amilibia eta ‘Txiki’ Gorostola. Hamar piraguista eta azken biak artzain lanak egitera. Loiun hegazkina hartu eta Londresera. Arazorik gabe. Londresko aireportuan zain genituen Wey Kayak klubeko lagunak, autobus txiki batekin eta furgoneta batekin. Ordu eta erdian iritsi ginen Guildfordera. Hotel txiki batean eman ziguten ostatu. Gu bakarrik geunden bertan, etxean bezala.

Ostirala. Goizeko bostetarako argia sartzen zen leihotik. Batzuk jaiki eta pasiatzera joan ziren, bazterrak ikustera. Gosaritarako bueltatu ziren hotelera, eta gero, 11etan, klubeko instalazioetara joan ginen. Sara etorri zitzaigun bila, cicerone lanak egitera. Piraguak Zumaiatik Ingalaterraraino ez garraiatzeagatik, hangoekin ibiliko ginela adostu genuen. Guk eskatu bezala banatu zizkiguten: hiru K2 eta lau K1. Hori bai, ez ziren puntako piraguak, nahikoa arruntak ziren guk ibiltzen ditugunen aldean. Baina beno, horrek ere balio izan digu ohartzeko zer nolako materiala maneiatzen dugun Itxas-Gainen. Entrenamendu saio bat egin genuen, ibilbidea ezagutzeko, ezer gutxi baikenekien Zumaiatik abiatu ginenean. Ikusi genuen ubidez betetako ibaia zela, eta porteo asko eta gogorrak zituela. Entrenatu ondoren, Wey Kayak klubean bertan bazkaldu genuen. Klub sozial moduko bat da, bere sukalde, jangela, egongela, gimnasio eta besterekin. Jatekoarekin ez ginen oso konforme gelditu, egia esan. Badakizue, han espezia asko botatzen dizkiete edozerri.

Bazkaldu ondorenerako joko batzuk zeuzkaten prestatuta guretzat, baina esan genien, behin hara joanda, nahiago genuela Londresera joan, hura ezagutzera. Ez zitzaien gaizki iruditu eta tren geltokiraino lagundu ziguten, zer tren hartu behar genuen azaltzeko. Londresen turismo pixka bat egin genuen. Konturatzerako zortzi eta erdiak ziren eta afaltzeko lekurik topatu ezinik gelditu ginen, dena itxira baitzegoen ordurako. Azkenean, denda batean jatekoa erosi eta hala moldatu genuen ostiraleko afaria.

Larunbatean berriro Londresera joan ginen. Egun osoa pasa genuen han, batera eta bestera, lehertuta bukatu arte. Anekdotarik ere ez zen falta izan: Harrod´s bitxidenda ezagunetik bota egin gintuzten atetik sartu orduko, inolako esplikaziorik eman gabe.

Igandea, estropada eguna. Gosaldu eta 11etarako iritsi ginen Wey Kayak klubera. Antolatzaileek proba ezberdinetan banatu gintuzten, mailaka. Ez genuen oso ondo ulertu zein zen irizpidea, esate baterako, proba berean aritu baitziren Kepa eta Mikel eta Miren eta Amaia. Kontuak kontu, seniorrek 20tik gora kilometro egin behar zituzten, zazpi porteorekin, eta besteek 15 bat, bost porteorekin. Estropada gogorra izan zen, porteo asko zirelako, luzeak eta malda handikoak. Ubide asko daudenez, porteoetan batetik bestera pasa behar zen. Porteo batzutan arranpa handiak zeuden, eta uretara bueltatzeko ia arrastaka jaitsi behar zen. Ubideetan ibiltzea ere ez zen erraza. Idurre bera une batean galdu egin zen. Zorionez, ubide egokia aurkitu zuen eta arazorik gabe jarraitu ahal izan zuen.

Orohar, oso emaitza onak lortu genituen. Kepa Etxabek irabazi egin zuen bere proba, eta Kepa Larrañagak eta Mikel Solozabalek ere bai K2an. Josu Ansola laugarren izan zen senior mailan; Ane Eizagirre eta Maite Amilibia seigarren, lema hautsi zuten arren; Miren Lopetegi eta Amaia Olaizola bigarren izan ziren; Karmele Eizagirre seigarren eta Idurre Peña zortzigarren.

Sari banaketaren ondoren, sei eta erdietan hango jendearekin afaldu genuen, klubean. Elkarri opariak eman (kamisetak, banderinak…) eta gero iluntzean buelta bat eman genuen Guildfordeko giroa ezagutzeko. Billarrean jokatu, parre batzuk egin eta gauerdirako denok ohera.

Astelehen goiza Guildfordeko azokara joateko aprobetxatu genuen, erosketa batzuk egiteko. Hamabi eta erdietan bila etorri zitzaizkigun aireportura eramateko. Auto pilaketa handian zeuden eta hiru eta erdietan iritsi ginen aireportura. Gaueko hamaikak laurden gutxitan iritsi ginen Zumaia. Nekatuta baina pozik.

Urolako igoera-jaitsierara etorriko dira handik, uztailaren 18an. Zortzi piraguista etorri dira eta dagoeneko Zumaia hotelean hartu diegu ostatu. Nesken K2 batek oso maila ona emango duela iruditu zitzaigun. Baina hori guztia ikusiko dugu eguna iristen denean.

Bidaiaren argazki albuma: Guildford2008

Aurtengo denboraldiko helburua gauzatu du Iñigo Peñak, Espainiako Master Txapelketa irabazi eta Europako Txapelketan K1ean lehiatzeko txartela lortu duelako. Iñigok 500 eta 1.000 metroetan irabazi zuen igandean Trasonan, Asturiasen. Emaitza bikaina da, Europako Txapelketara piraguista bakarra joango baita K1ean. Zorionak Iñigo!

Baleike.comen irakur ditzakezue Iñigoren adierazpenak

Itxas-Gaineko piraguistak ohituta gaude furgonetak hartu eta kilometroak eta kilometroak egitera. Galizia dela, Asturias edo Andaluzia, milaka kilometro egiten ditugu denboraldiko. Noizean behin, banaka batzuek izaten dute nazioarteko probetan lehiatzeko aukera, Europako Txapelketak edo Mundialak direla. Oraingo hau, baina ezberdina da.

Balentziaga ontziolan hasi zen dena. Egun batean, Zumaiara etorri behar zuela esan zion enpresak Antoni Sokolovi, beraientzat egiten ari ziren ontziak ikuskatzera. Behin Zumaian, egunero ikusten zituen Sokolovek piraguistak errioan gora eta behera, eta laster ohartu zen itsas kiroldegia ontziolaren parean zegoela, Urola ibaiaren bestaldean. Herriari neurria hartuta eta bertan hilabete batzuk egin beharko zituela jakinda, Itxas-Gainen atea jo zuen. Piraguista zela bera ere, eta Zumaian ere ibili nahiko lukeela. Klubean izena eman eta ordutik aurrera bat gehiago izan zen.

Alde egiteko ordua iritsi zenean, proposamen bat bota zion klubari: Itxas-Gainekoak Ingalaterrara joatea han antolatzen duten estropada batean lehiatzera, eta gero hango klubetik etortzea Urolako igoera-jaitsieran parte hartzera. Handik denbora batera Ingalaterrako Wey Kayak Clubeko presidentea etorri zen Zumaiara eta ados jarri ziren bi aldeak.

Eta horrela sortu zaigu asteburu honetan Ingalaterrara joateko aukera. Gaur arratsaldean abiatuko dira hamar piraguista eta klubeko bi ordezkari, Loiuko aireportutik Londresera –oraingoan behintzat hegazkinez!–. Londresetik hegoaldera 40 bat kilometrora dagoen Guildford hirira goaz, hangoa baita Sokoloven kluba. Probari buruz ez dakigu gehiegi: Wey ibaian dela eta sigi-saga jaisten denez porteo asko izango direla. Ingalaterrako maila nazionaleko estropada batean hartuko dugu parte eta ez dakigu oso ondo zer maila duten, baina horren beldur ez gara, paper txukuna egiteko nahikoa maila dugula pentsatzen dugulako.

Hauek dira Itxas-Gainen izena Ingalaterran defendituko dutenak:

k1 seniorra (giz.): Josu Ansola

k1 jubenila (giz.): Kepa Etxabe

k1 kadetea (emak.): Karmele Eizagirre eta Idurre Peña.

k2 kadeteak (giz.): Kepa Larrañaga eta Mikel Solozabal

k2 seniorrak (emak.): Maite Amilibia eta Ane Eizagirre

k2 kadeteak (emak): Miren Lopetegi eta Amaia Olaizola

Egutegiko estropada garrantzitsuenetakoa da Galiziakoa. Aurreko astean komentatu genuen normalean abuztuan jokatzen dela, baina aurten aurreratu egin dutela Olinpiar Jokoak direlako. Horren ondorioz piragua gutxiago izan dira, baina onenek han ziren guztiak. Maila handiko aurkariak, beraz. Horregatik, oso pozik bueltatu gara lortutako emaitzekin: kadete neskak bigarren izan dira, kadete mutilak bederatzigarren, eta senior mutilak hamaikagarren. Hona hemen bidaiaren kontakizuna:

Estropadak igandean izan arren, ostiralean abiatu ginen, 14:20an. Bidaiak furgonetan egiten ditugu beti, eta kasu honetan bederatzi ordu behar izan genituen Portonovora iristeko. Bidean afaldu genuen, etxetik eramandakoa. 23:00 jota iritsi ginen kanpinera. Eskerrak abisatu genien…

Larunbata entrenatzeko aprobetxatu genuen, batez ere porteoak. Azkenean kadeteek ez zuten porteorik egin behar izan, baina entrenamendua ez zitzaien gaizki etorri. Arratsaldea, besteak beste, txirlak eta almejak biltzen eman genuen, Portonovoko hondartzan. Afariari beste kategoria bat emateko aurkikuntza paregabea.

Igandean goiz jaki ginen, zortzi eta erdiak aldera. Kanpinak eta dena jaso, gosaldu, eta irteera aldera abiatu ginen. Estropadak 12:0oetan hasten ziren baina 10:00etarako han ginen, piraguak ondo prestatzeko. 12:00etan abiatu ziren seniorrak, Portonovoko hondartzatik. 20 kilometroko ibilbidea osatu behar izan zuten, bi porteorekin. Kadeteak berriz, 12:15ean abiatu ziren, Sanxenxotik. Hauek 15 kilometro egin behar zituzten. Seniorrek oso irteera ona egin zuten. Itsasoa bare zegoen, baina lehen porteoan, hondartzako olatu txiki bat piraguan sartu eta ura atxikatu behar izan zuten. Bigarren porteoa oso luzea egin zitzaien, oso nekatuta zeudelako ordurako, baina helmugaraino erritmoari eusteko gauza izan ziren. Azken txanparaino bederatzigarren postuan joan ziren, onenengandik oso gertu, baina azken metroetan atzetik aurrera ziztu bizian zetozen bi piraguek gainditu zituzten. Hala ere, oso pozik zeuden emaitzarekin, erronka hamar onenen artean sartzea baitzen.

Kadete mutilek ez zuten egunik onena izan, eta bederatzigarren sailkatu ziren. Neskek, ordea, emaitza bikaina lortu zuten, bigarren postuan amaitu baitzuten. Meritu handikoa, kontuan hartuta irteeran minutu asko galdu zituztela. Izan ere, haiekin batera atera ziren C-4ak. Albo batean zeudenez, harrapatuta gelditu ziren eta libratzerako aurkariak oso aurrean ziren. Baina sekulako lana eginda estropadako onenengana iritsi ziren azken txanparako. Esprintean, ordea, haraino iristeko egindako ahalegina ordaindu zuten, eta bigarren postuarekin konformatu behar.

Protagonistak:

k-4, seniorra (giz.): Haize Galarraga, Vicente Royo, Ekaitz Esteban eta Kepa Etxabe.

k-4, kadetea (giz.): Kepa Larrañaga, Mikel Solozabal, Asier Eltzo eta Xabi Centeno.

k-4, kadetea (emak.): Miren Lopetegi, Karmele Eizagirre, Amaia Olaizola eta Loredi Alzibar.

Hemen dituzue bidaiako argazkien albuma, eta seniorren probako bideo irudiak.

Denboraldiko estropada garrantzitsuenetakoa izaten da Principe de Asturias, Pontevedran. Normalean abuztuaren 15ean jokatzen da, amabirjinaren egunean, baina aurten Olinpiar Jokoak daudenez probako babesleek aurreratzea eskatu zuten. Lauko piraguentzako estropada da, eta oso ikusgarria izaten da. Irteera Portonovoko hondartzatik egiten da: piraguak uretan eta barruan hiru piraguista. Laugarrena hondartzan, 80 bat metrora. Irteera ematen dutenean laugarren kideak korrika batean joan behar du piraguara, sartu eta ahalik eta azkarren abiatzeko.

Nazioarteko proba denez, aurrena selekzioetako piraguak ateratzen dira –hauek laurak piraguan daudela–, eta denbora tarte baten ondoren, beste guztiak. Behin hondartzatik irtenda, itsasoan egiten da ia ibilbide gehiena. Bi porteo izaten dira, Sanxenxoko eta Convarroko hondartzetan, eta amaiera Pontevedrako itsasadarrean. Guztira, 20 kilometro inguruko ibilbidea. Gezurra badirudi ere, proba ikustera joaten diren ontziek sortzen dituzten olatuak dira zailtasun handiena.

Aurten Itxas-Gainek hiru ontzirekin hartuko du parte:

k-4, seniorra (giz.): Haize Galarraga, Vicente Royo, Ekaitz Esteban eta Kepa Etxabe.

k-4, kadetea (giz.): Kepa Larrañaga, Mikel Solozabal, Asier Eltzo eta Xabi Centeno.

k-4, kadetea (emak.): Miren Lopetegi, Karmele Eizagirre, Amaia Olaizola eta Loredi Alzibar.

Handik bueltan kontatuko dizuegu gauzak nola joan diren.

Ongi etorri Baleike blogak blogera. Hau zure lehenengo
mezua da. Aldatu edo ezabatu eta blogean idazten hasi!