Aurtengo urtea azken konpasetan dago eta urtero egiten dugun moduan igarotakoari begiradatxo bat eman nahi diogu. Azken hilabeteetan hainbat proiektu izan ditugu, kontzertuak, elkarlanak, estilo ezberdinetan murgiltzeko aukerak. Gehienak agerian geratu dira gure talaia honetan baina ekitaldietan arreta jarri aurretik “beste aldea” aipatu nahi genuke: entseguak, ahots teknika lantzeko klaseak …

Honen inguruan aurten ekintza berezi bat egin genuen. Helburua San Vicente de la Barquerako lehiaketa prestatzea bazen ere, bertan parte hartzeko hautatuak izan ez ginenez, teknika talde bezala lantzeko aukera ezin hobea  izan genuen. David Azurza aurrez ezagutzen genuen, goiz batean gurekin lan egiten egon baitzen. Seguran lan honetan sakontzeko aukera izan genuen, gorputza eta ahotsaren arteko loturak baita abesterakoan esaten duguna sinetsi eta, nolabait, musikaz antzeztu behar dugula.Mireia Otzerinjauregirekin, berriz, abesti modernoetan erabiltzen den teknikaren oinarriak landu genituen, abuztuan Gala Egunean egin behar genuena lantzeko aukera izan genuelarik.

Hurrengo goizean, “lagun zahar” bat etorri zitzaigun, Iñaki Tolaretxipi, bere umore finez “kaña” sartzera. Benetan gustagarria da berarekin lan egitea, hain abstraktu eta arraro diren kontzeptu horiek modu ulerkor batean jaso ahal izatea. Baina Seguran igarotako asteburu hartan ez zen dena lana izan, saskibaloian edota futbolinean jokatu partidak, Segurako plazan Manuren gitarraren laguntzaz, eskainitako emanaldi informala…ezin dira ahaztu eta taldearen sendotasunean antzematen diren gauzak direla esan genezake.

Aurtengo elkartrukeak Arrasatera eraman gintuen , Goikobalu Abesbatzari esker. Kontzertu polita izan zen, eliza jedez gainezka eta prestatuko egitaraua zabala izan zen. Errenazimenduko polifoniatik gaurko musikararte. Lotura honetan Joanes de Antxietaren “O bone Jesu” entzun dezakezue, pieza hau ere modu berezi batean landu genuen teknikaren aldetik, Ainhoa Francorekin egindako arratsalde bateko klase trinkoan. Urriaren 1an izan genituen Zumaian, komentuan kontzertua eskaini zigutelarik. Bi kontzertu hauen artean beste bi emanaldi eskaini genituen Zumaian, bata komentua, Europako Musikaren Egunaren baitan Beheko Plaza Abesbatzarekin batera. Emanldi hura gure ibilbidean ohikoa bezala definitu badezakegu abuztuan egindakoa askok jartzen diguten itxura serioarekin apurtzeko aukera eman zigun. Gala Egunean, beheko plazan jarritako kamioi batean azken hamarkadetako abesti ezagunak eskaini baikenituen. Zoritxarrez euriak eta batez ere “arazo teknikoek” ez ziguten utzi, hainbat izerdi kosta zitzaiguna zuei behar zen moduan eskaintzen.

Urteko azken bigarren kontzertuak Klarinete Maratoiaren baitan izan zen, azken urteetan ohitura bihurtu den Kafe Musikalean. Alondegian Josu Elberdinek idatzitako “Izar ederrak” abestitik abiatu eta Sorotan Bele, Ken Zazpi edota Eric Clapton-en lanak izan zenituzten entzungai. Zenbait obretan ZUMBeko kideen laguntza izan genuelarik. Orduko lana ganbara musika bezala ikusi bazitekeen, gabonetako kontzertuan bi taldeak osorik ikusteko aukera egon zen estilo anitzetako obrak egin genituelarik.Gure bide hau posible egiteko hainbat pertsonen lan ixila behar da, jendearen aurrera atera aurretik lan ordu asko baitaude: abestiak aukeratu, behar bada moldatu, abestiak ikasi, abesti hauek dituzten zailtasunak nola gainditu erakustea,  jendeari kontzertuak daudela jakinarazi… Bide honetan laguntzen diguten guztiei gure eskerrik beroena.Azken egun hauek hotz xamarrak direnez hemen duzue azken kontzertuan ZUMBeko lagunekin eskainitako “Candombe de San Baltasar”, gurea baino eskualde beroagoetako hotsak ekartzen dizkigu gogora.

Ez da lehenengo aldia koru eta bandarako kontzertu bat antolatzen dugula, horregatik gauza ezberdinak bilatu nahi izan ditugu, zenbait kasutan gure errepertorio ohikoenetik aldentzen diren lanekin. Esan genezake kontzertuak bi zati ezberdin izango dituela. Eskainiko dugun lehenengo abestia Tomas San Miguelen  Obaloa izango da, obra honek folk estiloaren iturrietatik edaten du eta txalaparta izango da obraren ardatza, kontzertua alaitasunez hasteko era polita.

Firmeetako musikagileak aipatzen direnean guztion ahotan egoten da John Williams-en izena. Steven Spieldberg-en “Amistad” filma ez da ezagunetarikoa, esklaboz betetako itsasontzi baten jabetzaren gaineko epaia kontatzen digularik. Abolizioaren aldeko aldarrikapen honetarako John William-ek Bernard Dadieren olerki bat musikatu zuen, testua afrikako mendebaldeko hizkuntz batera itzuliaz. “Dry your tears, Afrika” abestian joandakoen etorrera ospatzen da, bere herrira bueltatzen direnean.

Lehenengo zati honi amaiera emateko Queen taldearen abestirik ezagunetariko bat eskainiko dizuegu: Bohemian Rhapsody. Bere egiturari erreparatuz gero benetan bitxia d,a balada baten ondoren, adibidez, zati operistiko eta “ero” bat duelako. Zailtasun hauek medio Queen taldeak ezin izan zuen zuzenean grabatuta zegoen modura eskaini, besteak beste, hasieran “a capella” entzuten den zatian ahots guztiak Freddie Mercury-renak baitira.

Bigarren zatian berriz gabonen inguruan idatzitako musika izango dugu nagusi, musikaren bitartez herrialde ezberdinetako gabonak ezagutzeko aukera izango dugularik. Lehenengo abestia Irvin Berlin-en “White Christmas” izango da, hainbat moldaketetan entzuna, kasu honetan ZUMBeko kideak Big Band batean bilakatuko dira abestiari swing apur bat eskainiaz, Glen Miller-en orkestraren modura.

Tomás Aragüesek, Teruelen jaio bazen ere, ia bizitza osoa Euskal Herrian eman du. Donostiako Kontserbatorioko irakaslea izan zen urte askotan eta musikagile bezala lan zabala burutu du. Abangoardietatik ihesi, estilo klasiko bat landu du, harmonian maisu dela erakutziaz. Hau esanda argi geratzen da euskal eta nazioarteko gabon abesti herrikoiekin egin dezakeena. Benetan obra ederra da bere “Suite de Navidad”, milaka aldiz entzundako doinuei kolore berriak ezarriaz. Aurrez organoaren laguntzat eskaini badegu ere, aurten Mikel Emezabalek bandarako idatzi digun moldaketarekin entzuteko aukera izango dugu. Eta kontzertua amaitzeko “Candombe de San Baltasar” abestiak eskainiko dugu. Afrikako erritmo eta perkusioetan oinarritzen da Uruguayko abesti hau. Guretzat gabonetako irudiak elurraren kolorea izan ohi du, obra hau entzuterakoan argi geratzen da beste eskualdetan ez dela horrela gertatzen. Ez da hau umea lokartzeko abesti bat…

Guztiak zaudete gonbidatuta

Eguberri on!!!

Aurten ez da ostiral gauean izango, ostegun arratsaldean baizik. Tokia ere aldatu dute, Alondegian burutuko baita, agian kalean dagoen jendea erakartzeko asmoz. Espero dugu, ordea, ez dela giro berezi hori galduko. Urte hauetan estilo ezberdinetako musikak entzun ditugu, klasikoagoak, modernoagoak, abangoardia gogorreko lan ikusgarriak… Klarinetea guzti horren ardatz izan den arren, ZUMB-eko kideek lan berezia egin dute bandako beste musika tresnak ere formatu txikian uztartzen, beraien kontzertu ohikoetan egiten ez duten errepertorio bat landuaz.

Iaz koruko emakume talde batek ere parte hartu zuen Benito Lertxundiren “Udazken koloretan” eta Xabier Leteren “Adiskide bat bazen” ZUMB-eko partaideekin batera doinu ederrak eskainiaz.  Aurten berriz koru osoa izango dugu parte hartzen. Guk ere estilo ezberdinetako obrak eskaini nahi ditugu, baita koruen munduan oso ohikoak ez diren laguntza instrumentalekin. Klarinetea ere agertuko da, nola ez, baina ez da bakarra izango. Kafe Musikalak beti izan dira sorpresentzako toki egokia… Gonbidatuta zaudete

 Iñaki Tolaretxipiren hitzetan aurkari gogorrenetako bat  Balsis abesbatza izango da. Letoniako talde hau ikusteko aukera paregabea sortu zaigu, Tolosako Lehiaketaren inguruan sortzen den zirkuituari esker. Datorren azaroaren 1an San Pedro Parrokian abestuko baitute, arretsaldeko 19:00tan.

Eskainiko diguten egitarauari erreparatuz, Tomas Luis de Victoriaren obra batez (bere heriotzaren 400. urtemugan) eta Tolosako lehiaketan derrigorrezkoak izan diren Josep Vilaren “Sanctus-Benedictus” eta Xabier Sarasolaren “Zuk, zure ama…” lanez gain Letoniako eta inguruko beste herrialdeen musika izango da nagusi.

Hemen duzue talde honek eskainitako kontzertu batean eginiko grabaketa dibertigarri bat. Bertan argi geratzen da talde honek duen maila

Hemen duzue Iñaki Maidaganen zuzendaritzapean eskainiko diguten egitaraua. Bi obra sakroek irekiko dute kontzertua, Tomas Luis de Victoriaren O Magnum Mysterium motete famatua, egilearen heriotzaren 400. urtemugan eta Felix Mendelssohnek Eliaj (Elias) oratoriorako idatzitako koral bat. Honen ondoren musika herrikoia izango da kontzertuaren ardatz nagusia, euskal musika batez ere. Aipatu beharra dago azken hilabeteetan euskal musika biltzen duen CD baten grabaketan ibili direla Goikobalu abesbatzako kideak murgilduta. Uruguay eta Kubako musika ere izango dugu entzungai, baita Flying Pickets ahots taldearen moldaketa bat.

- O Magnun misterium T.L. de Victoria

- He That Shall Endure To The End F. Mendelssohn

- Ikusten Dezu J.B. Elizanburu

- Maitasun Atsekabea J. Guridi

- Ay, Hori Begi Ederra J. Busto

- Penas Beatriz Corona

- Te Quiero Favero/Benedetti

- Ziña Miguel Matamoros

- Laztana Flying Pickets

- Ni Ez Naiz Zomorroa J. Guridi

- Lastozko Zubiya J. Belloportu

- Kitolis L. de Aranburu

- Akerra Ikusi Degu J. Guridi

Egitarau guztia aztertu ondoren aipagarri da Jesus Guridiren hiru obra eskeiniko dizkigutela ikusteak, ez dugu ahaztu behar,  musikagile gazteiztarra hil zenetik 50 urte igaro direla. Hau aprobetxatuz, hemen duzue musikagile handi honek egindako euskal doinu ezagun baten harmonizazioa, Goikobalu Abesbatzako kideen ahotsetan.

Denak zaudete gonbidatuta….

Igaro dira abuztuko oporrak eta irailaren lehen egunetik entsaioetara bueltatzen gara. Lehen ekitaldia, usadio zaharra jarraituz, Arritokietako Salvean abestea izango da.  Antonio Trueba musikagile zumaiarraren obra hau 1885an abestu zen lehen aldiz. Bere izaera operistikoaregaitik, abesteari uzteko zorian egon zen baina zenbait zumaiarren lanari esker ez zen galdu.

Gure herriaren historia musikalaren zati garrantzitsua izanik, ospakizunean entzungo diren beste obrak ere modu berezi batean aukeratu ditugu, ahal den heinean gure herriko musikagileen lanak izango baitira.  Errosario aurretik Jose Maria Beobide idatzitako Zu zera gure Ama ereserkia izango dugu, Txomin Agirren idazle eta apaizaren hitzekin. Santua gure koruko kide den Iker Gonzalezena izango da, herriak eta koruak 5 ahotsetara abesteko idatzia. Berea ere izango da “Jaungoikoaren Bildaotsa”-ren moldaketa, doinua Loiolako kantutegitik aterata dagoelarik.

Eskaintzen unean Luis Urteagaren Assumpta est Maria motetea entzungai izango duzue, iaz musikagile honi eskaini genion homenaldirako berreskuratua. Jaunartze ondoren gure herriko historia musikalean toki berezi bat duen beste obra bat eskainiko dugu, Urteagaren Tota Pulchra. Kasu honetan musikagile berak ahots nahasietarako idatzitako bertsioan.

Zenbait abeslari oihen eskaerari erantzunez, Antonio Truebaren Salve Regina abestu nahi duten kantore oihei aukera zabaldu nahi diegu. Horretarako datorren asteartean gaueko bederatzitan parrokian egingo den entsaiora gonbidatu nahi ditugu.

Eta honen ondoren berriro entsaioak, abesti berriak, proiektu berriak…

Estilo ezberdinetako kantuak izango ditugu: Caribeko erritmoak, 70. eta 80. hamarkadetako kantu arrakastatsuak, gaur egungo abestiak… Lan honetan izango gara, ez bakarrik koru bezala baita bakarlari moduan koruko zenbait kide ere. Alde instrumentalean berriz: Mari Carmen Azpeitia pianoan, Manu Aguilar gitarran, Iker Gonzalez tekladuetan eta ZUMBeko kide den Ion Zubimendi bateria eta perkuzioetan. Guzti hau Amaia Aldalurren zuzendaritzapean eta estenatzean Uxua Gainzaren laguntzarekin.

 Hemen duzue Jon Urbietak grabatu digun bideoa. Hasi dadila Show-a….

Iaz, ZUMBeko lagunek antolatuta, Manuel Jorge Vicente, Luis Orduña eta Mikel Emezabal aritu ziren Musika Banden etorkizunaz solasean. Ekitaldi haren amaieran erronka bat bota ziguten,  aurten guk antolatu behar genuen “horrelako zerbait”. Ideia ezberdinak aztertu ondoren Musika Zientziaren uhinetan…  hitzaldia prestatu dugu.

Bertan, lehenengo lerroan agertu diren galderei erantzuna ematen saiatuko gara.  Zalantza hauei erantzuna aurkitzeko bideak akustikan aurkituko ditugun arren, ez da ekitaldi hau fisikaz edota matematika konplexuz betetako hitzaldi burutsu bat izango. Honen helburua ez baita gai hauetan sakontzea, eguneroko bizitzan aurkitzen eta jasaten ditugun hainbat gertaerei erantzun sinple eta ulergarri  bat ematea baizik. Horregatik: irudiak, musika ezberdinen grabaketak eta zuzeneko erakustaldiak izango dira nagusi.

Askotan hain urruti ikusten ditugu bi mundu hauek uztartzen saiatuko da, gure koruko partaide den, Iker Gonzalez, Cobeaga, kimikan doktorea eta musiko afizionatua. Guzti honetan murgiltzeko aukera, Alondigan Abuztuaren 3an  arratsaldeko zortzietan. Denak zaudete gonbidatuta.

Eskainiko diguten ekitaldia bi zati ezberdinetan banatuta egongo da. Lehenengo zatiaren ildoa musika sakroa izango da, errenazimendutik gaur egunerarte idatzitako musika adibide ezberdinak izango ditugularik entzungai. Jacobus Gallus eta Heinrich Schütz-ek emango diote hasiera zati honi bere polifonia garbiarekin. Honen ondoren erromantizismo alemaniarrera bidaiatuko dugu Felix Mendelssohn eta Johannes Brahms-en eskutik. Zati honen azken hiru obrak musika garaikidean kokatu ditzakegu, Franck Martin, Ko Matshushita eta Josep Vila-ren lanak izango baitira.

Bigarren zatian, berriz, musika herrikoia izango da nagusi. Javi Bustoren moldaketan, Mikel Laboaren Nerea izango zen abesti ezagunarekin ekingo diot bigarren zati honi. Honen ondoren etorriko da Hondarribiko musikagilearen beste lan bat  Sagastipean, bere errepertoriotik zabalduenetako bat. Javier Bello-Portu tolosarraren Une vielle chanson d’amour abesti goxoa izango dugu entzungai ondoren. Bi estrenaldi entzuteko aukera ere izango ditugu, biak egile berarenak gainera, Kup Taldeko kide den Josu Elberdinenak ain zuzen, bere izenburuak Gaur akelarre eta Izar ederrak. Xabier Sarasolaren Neskatx ederra abestiarekin goxatzeko aukera izan ondoren amaitzeko “bi klasiko” Aita Donostiaren Iru txito eta Uruñuelaren Maitia nun zira izango ditugu, aurkezpenik behar ez duten bi abesti.

Kontzertua Abuztuaren 1an, gaueko hamarretan, San Pedro Parrokian izango da. Eta amaitzeko musika apur bat, Kup Taldearen eskutik, jakina.

Beheko Plaza-ko lagunek, Agustin Zubimendiren zuzendaritzapean ohikoak bihurtu diren Tchaikovsky-ren Urretxindorra edota Anjel Barja-k moldaturiko A la orilla de un palmar abestiez gain. Andaluziako folklorean oinarritutako bi abesti eskainiko dizkigute: Ojos traidores eta Zorongo, azken bi hauek Jaengo Mancha Real herrira egingo duten bidairako prestatuak izan direlarik. Euskal musika ere ez da faltako Oles ezkonberriak, Goizean argi hastean eta Herriko Festa doinu ezagunenekin.

San Pedro Abesbatzak, berriz, Amaia Aldalurren zuzendaritzapean, bere emanaldiari obra sakro batekin ekingo dio, Gregor Aichinger musikagile alemaniarraren  Regina Caeli motetearekin hain zuzen ere. Ondoren eskainiko ditugun hiru obrak Kantabriako herri musikan oinarrituta daude, nahiz eta hirurek egile gipuzkoarra izan: Tomás Garbizu (San Vicente de la Barquera) eta Javi Busto (Tres nanas cántabras eta Barquereño). Las ruinas de Iranzu edota Piedras bezala ezaguna den Stehle-ren Las ruinas del monasterio abestia entzuteko aukera izango duzue koruko gizonen ahotsetan. Amaitzeko Tolosako Lehiaketan derrigorrezko obrak izan diren Xabier Sarasola beasaindarraren Neskatx ederra eta Luis Aramburu gasteiztarraren Kitolis abestiak eskainiko ditugu.

Denak zaudete gonbidatuta….